Baladweyne, (insidesomalia.org) - Waxaa xalay laga sii daayay xabsi ku yaala Baladweyne isku duwihii dowladaha hoose ee Gobolka Hiiraan Cabduqaadir Afdhuub Makaraan, iyadoo dhawaan ay xireen Ciidamada Itoobiya ee ku sugan Gobolkaas.

Xariga Mas'uulkaan ayaa loo aaneeyay ishortaag uu ku sameeyay canshuuraad uu Guddoomiyaha Degmada Baladweyne Aadan Cabdi Ciise (Aadan Garaase) kusoo rogay ganacsatada iyo gaadiidleyda Gobolkaas ka shaqeeya.

Makaraan ayaan la ogeyn sababta dhabta ah ee keentay in la sii daayo, isaguna kama hadlin saxaafada, waxaase warar hoose ay sheegayaan inuu ogolaaday qorshaha Aadan Garaaso uu wato.

Odayaasha Golaha dhaqanka ee Gobolka Hiiraan ayaa iyaguna dhankooda horay ugu gacansayray go'aanka canshuuraadka ah ee lagu soo rogay Gobolka, waxayna ku tilmaameen kuwo aan suurogal ahayn.

Aadan Garaaso ayaa dhankiisa ku adkeystay inuu wadayo cashuuraadka, waxaana hadalo badan kasoo celiyay canshuuraadkaan ganacsatada Gobolka, balse waxaa muuqata in lagu qasbay.

Degmada Baladweyne ayaa dhanka kale laga sheegayaa amaandarooyin aad u xoogan iyadoo habeenkii dadka rayid ah ay dhac u geysteen kooxo hubeysan oo aan la garanayn.